Kónčina mjez sakskej a pruskej Hornjej Łužicu sewjernje Budyšina a Lubija bu kónc 19. lětstotka wot mnohich železniskich linijow tangěrowana.

W dokumentach wikowanskeje a přemysłoweje komory móžemy wo tym čitać, zo je Sakske statne knježerstwo wšudźe hustu železnisku syć wutworiło, jeničke wuwzaće bě kónčina sewjernje Budyšina. Sakska prócowaše so hižo 40 lět wo železnisku čaru pódłu stareje hłowneje wikowanskeje dróhi Hamburg-Stettin-Berlin-Wien, tola z Pruska tute předewzaće wosebje ze strategiskich přičin haćeše.

Dnja 29. februara 1888 dowoli kralowsko-sakski dekret twar mjez Budyšinom a Rakecami. Hač do awgusta 1889 bu čara wottykana. Přijomniše stejišćo bliže k Radworjej pak zwrěsći na spjećowanju někotrych wobsedźerjow ležownosćow. Po jenož jednym lěće twarskeho časa móžachu 19,9 km dołhu železnisku čaru hač do Rakec dnja 2. decembra 1890 wotewrić.

Wupyšenej lokomotiwje CUNEWALDE a HALBENDORF transportowaštej prěni ćah do Rakec. Samsny dźeń nastupi póstowa kuča swoju poslednju jězbu po šoseji do Budyšina. Planowany wobchad mjez Budyšinom a Rakecami z najprjedy třomi dwójkami ćahow započa so dźeń pozdźišo.

W aprylu 1890 dźěłaše wjace hač 1.000 dźěłaćerjow při železniskim twarje čarje Mały Wjelkow -Rakecy.

Prócowanja wo rozšěrjenje čary wot Rakec do Wojerec dale trajachu. Statne zrěčenje z 24.03.1905 rjadowaše twar podlěšenja čary Rakecy - Wojerecy, kotryž dyrbještaj wobaj krajej swojim krajnym teritoriju na swójsku zličbowanku wukonjeć.

Radworske dwórnišćo bě wokoło 1900 planowane a měješe křižowanske dwórnišćo (to je přechodne dwórnišćo ze znajmjeńša dwěmaj so křižowacymaj čarjomaj). Při tym dźěše wo železnisku čaru Budyšin - Wojerecy a železnisku čaru Lubij - Radwor (z ewtl. rozšěrjenjom do Kamjenca). Na to buchu kolije powjetšene a podlěšene, tak zo móžeštaj dwaj ćahaj z dołhosću 450 m na dwórnišćo jěć.

Wot apryla 1905 do 1. meje 1906 je tuchwilu hišće wobstejace dwórnišćowe twarjenje wot twarskeje firmy z Budyšina natwarjene. Z dotwarom wotmě so poswjećenje čary Radwor-Lubij.

Na železniskej čarje Budyšin - Rakecy jězdźeše 1990 / 1991 dźewjeć porow ćahow a jedyn spěšnik.

Dnja 15. awgusta 1998 bu železniska čara Lubij–Radwor zawrjena a 19. julija 2001 tež železniska čara Budyšin– Wojerecy.

Wot toho časa je dwórnišćo bjez železniskeho wobchada. Tež železniska čara bu wotwěnowana.

W juniju 2020 zahaji so twar, kotryž traješe hač do januara 2023 (corona-pandemija zawinowa dołhi twarski čas a nimo toho tež ćeže při wobstaranju materiala, n.př. wohnjoškitna připrawa)